თბილისის საკრებულოს წევრმა, მესამე მასივის მაჟორიტარმა დეპუტატმა გიორგი დოხტურიშვილმა, სამგორის რაიონის გამგებელ კახაბერ გულედანთან ერთად, ზემო პლატოს 40-ე, კალოუბნის N36ა-38-ე, VI კვ 7-13 კორპუსებთან და 176-ე საჯარო სკოლასთან მიმდინარე საგზაო სამუშაოები დაათვალიერა და ადგილობრივ მოსახლეობას შეხვდა.
როგორც „ინტერპრესნიუსს“ თბილისის საკრებულოდან აცნობეს, აღნიშნულ მისამართებზე გამოიცვალა წყალარინების ქსელი, ამჟამად კი ტროტუარების და ბორდიურების მოწყობა და ახალი ასფალტის საფარის დაგება მიმდინარეობს.
„მესამე მასივში ვხვდებით მოსახლეობას, ვეცნობით მათ საჭიროებებს, ასევე მიმდინარეობს იმ სამუშაოების მონიტორინგი, რომელსაც რაიონული გამგეობა ახორციელებს. მიმდინარე საგზაო სამუშაოები რამდენიმე დღეში დასრულდება და ადგილობრივი მოსახლეობის მნიშვნელოვანი პრობლემა მოგვარდება“, - განაცხადა გიორგი დოხტურიშვილმა.