სირიის საკითხის დარეგულირებაში აშშ-სგან რაიმე პოზიტიური როლი მოსალოდნელი არ არის, - ამის შესახებ ირანის პრეზიდენტმა ჰასან რუჰანიმ თეირანში რუსეთისა და თურქეთის ლიდერებთან შეხვედრაზე განაცხადა.

„მშვენივრად გვესმის, რომ ამერიკელები არაკანონიერად იმყოფებიან სირიის ტერიტორიაზე და მხოლოდ აგრესიისა და ექსტრემისტების მხარდაჭერით არიან დაკავებულნი. მათგან რაიმე პოზიტიური როლი სირიის საკითხის დარეგულირებაში მოსალოდნელი არ არის“, - განაცხადა ირანის პრეზიდენტმა.

ჰასან რუჰანის თქმით, აშშ-ს მიერ სირიის საქმეებში უკანონო ჩარევა „არ შეესაბამება არც ერთ საერთაშორისო წესს“.

„ამერიკელების სირიაში ყოფნა მხოლოდ ამწვავებს პრობლემებს და სირიაში მდგრად მშვიდობას ართულებს“, - აღნიშნა მან.

ჰასან რუჰანიმ ასევე ისაუბრა ისრაელზე და ხაზგასმით აღნიშნა, რომ ისრაელმა სირიის ოკუპირებული ტერიტორიები უნდა დატოვოს.

„საერთაშორისო რეზოლუციებისა და სირიელი ხალხის მოთხოვნების თანახმად, ისრაელის საოკუპაციო რეჟიმმა დაუყოვნებლივ უნდა დატოვოს სირიის ოკუპირებული ტერიტორიები“, - დასძინა მან.