სომხეთის პრემიერ-მინისტრის ნიკოლ ფაშინიანისა და პარლამენტის ფრაქციების შეხვედრაზე მხოლოდ იმაზე შევთანხმდით, რომ კიდევ ერთხელ შევხვდებით ერთმანეთს, - ამის შესახებ სომხურ მედიას პარლამენტის ვიცე-სპიკერმა, ოპოზიციური რესპუბლიკური პარტიის წევრმა ედუარდ შარმაზანოვმა განუცხადა.
მისი თქმით, შეხვედრაში 20-მდე დეპუტატი მონაწილეობდა და თითოეულმა მხარემ შექმნილ სიტუაციასთან დაკავშირებით საკუთარი აზრი გამოთქვა.
„ჩვენ მხოლოდ იმაზე მოვილაპარაკეთ, რომ კიდევ ერთხელ შევხვდებით ერთმანეთს და ვიმსჯელებთ სიტუაციაზე. ჩვენ გამოვთქვით საკუთარი აზრი და აღვნიშნეთ, რომ პარლამენტის რეგლამენტის ცვლილება რიგგარეშე არჩევნების ჩატარებისთვის წინააღმდეგობას არ წარმოადგენს და რომ ჩვენი მიზანი რიგგარეშე არჩევნების ბლოკირება არ ყოფილა. ასეთი სურვილის შემთხვევაში, ჩვენ საერთოდ არ წავიდოდით მოლაპარაკებებზე“, - განაცხადა დეპუტატმა.
შეგახსენებთ, რომ გუშინ, ნიკოლ ფაშინიანმა მთავრობის 5 წევრი გაათავისუფლა და განაცხადა, რომ ამ ბრძანების ძალაში შესვლის შემდეგ თანამდებობას თვითონაც დატოვებს. მისივე თქმით, მიღწეულია შეთანხმება, რომ არც ერთი საპარლამენტო პარტია პრემიერის პოსტზე საკუთარ კანდიდატს არ დაასახელებს და ამის შემდეგ რიგგარეშე საპარლამენტო არჩევნები დაინიშნება.