ბერლინში ავტომობილი ფეხით მოსიარულეებს შეეჯახა. ამის შესახებ ქალაქის საგანგებო სიტუაციების სამსახური იუწყება.

„საგზაო-სატრანსპორტო შემთხვევა მოხდა შარლოტენსბურგის რაიონში. დაუდგენელი მიზეზის გამო, მსუბუქი ავტომობილი ჯერ ადამიანთა ჯგუფს, შემდეგ კი ერთ-ერთ შენობას შეეჯახა. სულ მცირე 5 ადამიანი დაშავდა“, - ნათქვამია სამსახურის განცხადებაში.

გავრცელებული ინფორმაციით, სამართალდამცველებმა მძღოლი დააკავეს. დაშავებულები საავადმყოფოებში არიან გადაყვანილი.

ბერლინის პოლიციამ მომხდარის გამოძიება დაიწყო.

„წინასწარი ინფორმაციით, მძღოლს ჯანმრთელობასთან დაკავშირებული პრობლემები ჰქონდა“, - ნათქვამია ბერლინის პოლიციის „ტვიტერის“ ოფიციალურ გვერდზე.