შს ყოფილი მინისტრის ვანო მერაბიშვილის ოჯახის წევრის სტეფანე თუმანიშვილის ინფორმაციით, ჰორნერის სინდრომის გამომწვევი მიზეზი დაგვიანებული კვლევების გამო ვერ დადგინდა. ამის შესახებ თუმანიშვილმა დღეს გამართულ პრესკონფერენციაზე განაცხადა.

თუმანიშვილის განმარტებით, სამედიცინო კონსილიუმის დასკვნაში პირდაპირ წერია, რომ მიზეზები სიმპტომების გამოვლენიდან მალევე საფუძვლიანი კვლევების ჩაუტარებლობის გამო ვერ დგინდება. თუმანიშვილი ამბობს, რომ შს ყოფილ მინისტრს პირველი კომპლექსური კვლევა ჩივილების გამოხატვიდან თვენახევარში ჩაუტარდა.

„არ ვიცით ჰორნერის სინდრომის გამომწვევი მიზეზი და ამაზე სრული პასუხისმგებლობა ეკისრება იუსტიციის სამინისტროს და სასჯელაღსრულების დეპარტამენტს. ამ კონსილიუმის დასკვნიდან ერთადერთი რაც შევიტყვეთ არის ის, რომ გამოხატული სიმპტომებიდან მისი სრულყოფილი კვლევის ჩატარებამდე საკმაოდ დიდი დროა გასული და ამიტომაა მიზეზები დაუდგენელი. ამასთან, გაკეთდა განცხადებები თითქოს მისი მდგომარეობა გაუმჯობესდა. ამაზე ცალსახად მინდა განვაცხადო, რომ ეს არ შეესაბამება სინამდვილეს. მე მქონდა საუბარი ვანო მერაბიშვილთან და მითხრა, რომ მდგომარეობის გაუმჯობესების შესახებ მას არსად არ განუცხადებია და საიდან მოაქვს სასჯელაღსრულების დეპარტამენტს მსგავსი ინფორმაცია, ჩემთვის ეს უცნობია“, - განაცხადა სტეფანე თუმანიშვილმა.