აბაშის მუნიციპალიტეტის მერი ლევან მაკალათია, „საგანგებო სიტუაციების კოორდინაციისა და გადაუდებელი დახმარების ცენტრის" თანამედროვე ტიპის ოფისის მშენებლობის მიმდინარეობას გაეცნო.

“აბაშის მუნიციპალიტეტს აქამდე არ გააჩნდა სპეციალიზებული სასწრაფო სამედიცინო ცენტრის შენობა, ამჟამად აღნიშნული ცენტრი განთავსებულია კორპორაცია „ევექსის“ აბაშის ჰოსპიტალის შენობაში. ახალი პროექტის მიხედვით, შესაძლებელი იქნება თანამედროვე მოთხოვნათა გათვალისწინებით განხორციელდეს მოსახლეობის სამედიცინო მომსახურება”, – განაცხადა ლევან მაკალათიამ.

აბაშის მუნიციპალიტეტის ინფორმაციით, პროექტი რეგიონებში განსახორციელებელი პროექტების ფონდიდან ფინანსდება და მისი ღირებულება 234 189 ლარია. სასწრაფო სამედიცინო დახმარების ცენტრის ოფისის მშენებლობა ნოემბრის ბოლოს დასრულდება. სამუშაოებს ასრულებს შპს. „თ.ბ-კაპიტალი“.