უმრავლესობის ლიდერის არჩილ თალაკვაძის განცხადებით, ახალქალაქში ძალადობის ესკალაცია გრიგოლ ვაშაძის მხარდამჭერებმა მოახდინეს, როდესაც საარჩევნო პლაკატები დემონსტრაციულად ჩამოხიეს და სავარაუდოდ, მძიმე შეურაცხყოფა მიაყენეს სალომე ზურაბიშვილის მხარდამჭერებს.

ამასთან, როგორც თალაკვაძემ პარლამენტის პლენარულ სხდომაზე აღნიშნა, მომხდარ ძალადობას ემიჯნებიან და ძალადობა ის ტექნოლოგია არ არის, რომლითაც არჩევნებში რაიმე შედეგის მიღებაა შესაძლებელი.

“მოვუწოდებთ საგამოძიებო ორგანოებს, დამაჯერებლად გამოიძიონ ეს ფაქტი და ადეკვატური, პრინციპული რეაგირება მოხდეს“, - განაცხადა თალაკვაძემ პარლამენტის პლენარულ სხდომაზე.

შეგახსენებთ, რომ „ძალა ერთობაშიას“ ინფორმაციით, ახალქალაქში მათი ოთხი აქტივისტი სცემეს. მათგან სამს მკურნალობა თავდაპირველად ადგილზე უტარდებოდა, ხოლო ერთი მალევე თბილისში გადმოიყვანეს.

ამ დროისთვის თბილისის ტრამვატოლოგიურ კლინიკაში სამი დაშავებული მკურნალობს.