საფრანგეთის პრეზიდენტ ემანუელ მაკრონზე თავდასხმის მომზადებაში ეჭვმიტანილმა პირებმა ბრალი აღიარეს.
როგორც ტელეარხი France 2 პოლიციაში საკუთარ წყაროებზე დაყრდნობით იუწყება, თავდასხმის მომზადებაში ეჭვმიტანილებმა დაკითხვის დროს აღიარეს, რომ პირველი მსოფლიო ომის დასრულების მე-100 წლისთავისადმი მიძღვნილი ღონისძიებების დროს საფრანგეთის პრეზიდენტზე დანით თავდასხმა სურდათ.
შეგახსენებთ, რომ 6 ნოემბერს საფრანგეთში შიდა უსაფრთხოების მთავარი სამმართველოს თანამშრომლებმა ემანუელ მაკრონზე თავდასხმის მომზადებისთვის ექვსი პირი დააკავეს.
France 2-ის წყაროს ინფორმაციიით, ორი ეჭვმიტანილი პოლიციამ გაათავისუფლა, ოთხმა კი წარდგენილი ბრალი აღიარა. დაკითხვისას მათ განაცხადეს, რომ თავდასხმის იდეა 62 წლის ჟან-პიერ ბ.-ს ეკუთვნის. დანის გამოყენებით თავდასხმა 7 ნოემბერს იგეგმებოდა. ჟან-პიერ ბ.-ს ავტომობილის ჩხრეკისას პოლიციამ აღმოაჩინა კერამიკული დანა, რომლითაც, ეჭვმიტანილების თქმით, თავდასხმის განხორციელება იგეგმებოდა.