ჯანდაცვის მინისტრმა დავით სერგეენკომ საცხოვრებელ სახლში აფეთქების შედეგად დაშავებული ოთხი პაციენტი თბილისის დამწვრობის ცენტრში მოინახულა.

როგორც დავით სერგეენკომ განაცხადა, პაციენტების მდგომარეობა რეალურად მძიმეა.

„პაციენტები, რომლებმაც ხობში გუშინ მძიმე დამწვრობა მიიღეს, გადმოყვანილი არიან დამწვრობის ცენტრში. სამწუხაროდ, ოთხივე მათგანის მდგომარეობა მძიმეა. მათ სხეულის დიდი ნაწილი აქვთ დამწვარი და ასევე, სასუნთქი გზების დამწვრობა აქვთ. ექიმები ყველაფერს აკეთებენ მათ გადასარჩენად. იმედია მაქვს, ექიმები ამას შეძლებენ, თუმცა, მათი მდგომარეობა რეალურად მძიმეა. ისინი რეანიმაციულ განყოფილებაში განაგრძობენ მკურნალობას", - განაცხადა სერგეენკომ.

მისივე თქმით, რაც შეეხება კიდევ ორ პაციენტს, მათ სპეციალიზებულ კლინიკაში გადმოყვანა არ დასჭირდათ და ადგილობრივ კლინიკაში მკურნალობენ.

ხობში, საცხოვრებელ სახლში სავარაუდოდ, ბენზინის აალების შედეგად 7 ადამიანი დაშავდა. აქედან 5 თბილისში გადმოიყვანეს, საიდანაც ერთი დღეს დილით გარდაიცვალა. დანარჩენი ორის თბილისში გადმოყვანა კი საჭირო არ გახდა.

იხილეთ ვიდეო: ხობში აფეთქების შედეგად დაშავებულები ჯანდაცვის მინისტრმა მოინახულა