გაერთიანებული ოპოზიციის „ძალა ერთობაშია“ საპრეზიდენტო კანდიდატის გრიგოლ ვაშაძის განცხადებით, "ომეგა ჯგუფის" დამფუძნებლის ზაზა ოქუაშვილის გარშემო შექმნილ სიტუაციას ის უყურებს, როგორც მრავალსერიან მხატვრულ ფილმს.

მისივე თქმით, ზაზა ოქუაშვილის მიერ ბოლო თვეების მანძილზე წარმოდგენილი მტკიცებულებები მისთვის სრულიად საკმარისია.

„მას შემდეგ, რაც ზაზა ოქუაშვილთან დაკავშირებით ეს ყველაფერი დაიწყო, მე ამას ვუყურებ როგორც მრავალსერიან მხატვრულ ფილმს. ოქუაშვილი ასახელებს ფაქტს და შემდეგ ეს ფაქტი მყარდება მტკიცებულებით. გუშინ მან თქვა, რომ შესაბამისი მტკიცებულებები წარედგინება დიდი ბრიტანეთის სასამართლოს და ფრანგულ გამოძიებას. აუცილებლად გამოქვეყნდება ეს ყველაფერი. ჩემთვის, როგორც საქართველოს მოქალაქისთვის, ზაზა ოქუაშვილის მიერ სამი-ოთხი თვის მანძილზე საზოგადოებისთვის წარმოდგენილი მტკიცებულებები სრულიად საკმარისია. ყოველ კონკრეტულ ფაქტზე მას მტკიცებულება აქვს და შემიძლია დაგამშვიდოთ, რომ ის აუცილებლად კიდევ ბევრჯერ „გაახარებს“ „ქართულ ოცნებას“, - განაცხადა გრიგოლ ვაშაძემ.

შეგახსენებთ, რომ „ომეგა ჯგუფის" დამფუძნებელი ზაზა ოქუაშვილი აცხადებს, რომ მას ექს-პრემიერი ბიძინა ივანიშვილი „იმედის" ეთერით განცხადების გაკეთებას სთხოვდა, სადაც იტყოდა, რომ კომპრომატები, რომელიც გამოქვეყნდა ბიზნესის რეკეტთან დაკავშირებით, დადგმული იყო და მას ამის გაკეთება ნიკა გვარამიამ და მიხეილ სააკაშვილმა სთხოვეს.