თბილისში რეაბილიტირებული მედიცინის მუზეუმი გაიხსნა. ღონისძიებას საქართველოს განათლების, მეცნიერების, კულტურისა და სპორტის მინისტრის მოადგილე ლევან ხარატიშვილი და მუზეუმის დირექტორი რამაზ შენგელია გაუძღვნენ.

ლევან ხარატიშვილის თქმით, მუზეუმი მეცნიერებისა და ახალგაზრდა მკვლევარებისთვის საინტერესო იქნება. “30-წლიანი პაუზის შემდეგ საქართველოს განათლების, მეცნიერების, კულტურისა და სპორტის სამინისტროს მუზეუმის ფინანსური ხელშეწყობით ხდება უკვე რეაბილიტირებული მედიცინის ისტორიის მუზეუმის გახსნა, რომელიც ბევრად უფრო მეტია, ვიდრე მხოლოდ მუზეუმი, რადგან ეს არის სივრცე, სადაც განათლება, მეცნიერება და კულტურა ერთმანეთს ხვდება. დარწმუნებულები ვართ, რომ თვითონ მუზეუმის განსაკუთრებული ისტორიიდან გამომდინარე ეს არის კავკასიის რეგიონში ერთადერთი ამ პროფილის მქონე მუზეუმი და ის ძალიან ბევრი მეცნიერისთვის, მკვლევარისთვის და ახალგაზრდისთვის მიზიდულობის წერტილს შექმნის. ჩვენ რა თქმა უნდა, გვეამაყება, რომ მუზეუმის გახსნა სწორედ იმ წელს ემთხვევა, როდესაც ევროპა კულტურული მემკვიდრეობის წელს აღნიშნავს”,- განაცხადა ხარატიშვილმა.

საქართველოს განათლების, მეცნიერების, კულტურისა და სპორტის სამინისტროს ინფორმაციით, უწყების მხარდაჭერით, მედიცინის მუზეუმის სარეაბილიტაციო სამუშაოები 2014 წლიდან დაიწყო. მათივე თქმით, 2014-2018 წლებში, სამინისტროს მიერ რამდენიმე მიმართულების პროექტი დაფინანსდა. ამასთან, მუზეუმის ინფრასტრუქტურის მოსაწესრიგებლად 625 607 ლარი გამოიყო - განხორციელდა შენობის სრული რეაბილიტაცია, აღდგა ეზოც. უწყების ინფორმაციით, მუზეუმის რეაბილიტაციის საქმეში წვლილი შეიტანა თბილისის მერიამაც.