იუსტიციის სახლთან მოქალაქეთა ნაწილის საპროტესტო აქცია გრძელდება. აღსანიშნავია, რომ აქციის ერთ-ერთი ორგანიზატორი დიმიტრი ლორთქიფანიძე წუხელ დაკითხვაზე იმყოფებოდა.

როგორც ლორთქიფანიძემ „ინტერპრესნიუსს“ განუცხადა, მის წინააღმდეგ, სავარაუდოდ, სისხლის სამართლის კოდექსის 142-ე მუხლით საქმეა აღძრული.

„წუხელ დამირეკეს და მითხრეს, რომ დილით დაკითხვაზე ვიყავი დაბარებული. ვუთხარი, რომ დილით აქციაზე უნდა მივსულიყავი და შევთავაზე, თუ სურდათ ღამითვე დავეკითხე. დამიბარეს და მივედი ღამის 01:00 საათზე. მითხრეს, რომ საქმე ეხება ჩემ მიერ უცხოელებისთვის შენობაში შესვლის უფლების შეზღუდვას. ვფიქრობ, სისხლის სამართლის საქმეა აღძრული. როგორც ჩანს, გიორგი გახარიას საპრემიეროდ მაჟორული აკორდის აღება სჭირდება“, - განაცხადა დიმიტრი ლორთქიფანიძემ.

როგორც ცნობილია, მოქალაქეთა ნაწილი უცხოელებზე მიწების გაყიდვის თაობაზე გამოცხადებული მორატორიუმის გაუქმების შესახებ საკონსტიტუციო სასამართლოს გადაწყვეტილებას აპროტესტებს და უკვე მეორე დღეა იუსტიციის სამინისტროსთან აქციას მართავს. მოქალაქეები უწყებას მოუწოდებენ, უცხოელებს მიწების დარეგისტრირების უფლება არ მისცენ. აქციის მონაწილეებმა გუშინ იუსტიციის სახლში შესასვლელი კარის პიკეტირება მოახდინეს და გარკვეული დროის განმავლობაში იქ არავის უშვებდნენ.