ფოთში, ნაბადის უბანში, მოსახლეობამ აქცია გამართა. აქციის მონაწილეებმა 30 ნოემბერს, ძლიერი ქარის შედეგად მიყენებული ზარალის ანაზღაურება მოითხოვეს. მათ რამდენიმე წუთით საავტომობილო გზაც გადაკეტეს.
ნაბადის უბნის მცხოვრებლების თქმით, 30 ნოემბერს ძლიერმა ქარმა სახლების სახურავები დააზიანა.
,,სტიქიამ ფოთში რამდენიმე სახლი დააზიანა, მათ შორის ჩემიც. სახურავი მთლიანად ჩაინგრა. ხელისუფლების წარმომადგენლები იყვნენ, დაგვპირდნენ, რომ დაგვეხმარებოდნენ, მაგრამ დღემდე არანაირი შემწეობა არ მიგვიღია. ოჯახის რამდენიმე წევრი ღამეს ახლობელთან ათევს“, - განუცხადა ჟურნალისტებს აქციის მონაწილე ზოია გრაფიშვილმა.
თავის მხრივ, მერიაში აცხადებენ, რომ ყველა დაზარალებულს შესაბამისი დახმარება გაეწევა.