საია-სა და “სამართლიანი არჩევნების” მიმართ იყო თხოვნა და მოთხოვნა, რომ დავით კირკიტაძის დაკავების საქმეს მონიტორინგი გაუწიონ, - ამის შესახებ “ერთიანი ნაციონალური მოძრაობის” წარმომადგენელმა ხატია დეკანოიძემ ჟურნალისტებს არასამთავრობოების წარმომადგენლებთან შეხვედრის დასრულების შემდეგ განუცხადა.
მისივე თქმით, არასამთავრობო ორგანიზაციებთან თანამშრომლობის გაგრძელებაზეც შეთანხმდნენ. “ეს იყო დახურული შეხვედრა და ნამდვილად ძალიან საქმიანად ვისაუბრეთ. ჩვენ მივაწოდეთ ყველა ის ინფორმაცია, რომელიც შეეხებოდა ხელისუფლების მიერ კონსტიტუციის ჩარჩოს მიღმა გასვლას. ასევე, საუბარი ეხებოდა 2 დღის წინ ველისციხეში განვითარებულ მოვლენებს, ჩვენი რეგიონული ლიდერის დაკავებას, რომელიც უკანონოდ მიმდინარეობდა და ასევე, სხვა მიმდინარე საქმეებს, რომლებზეც ხელისუფლების მხრიდან არც ერთი დამნაშავე არ არის დასჯილი და საქმე გვაქვს ორმაგ სტანდარტებთან. შევთანხმდით თანამშრომლობის გაგრძელების მიმართულებით და სამწუხაროდ, სხვა დეტალებზე ვერ ვისაუბრებ. თანამშრომლობას ყველა მხრივ გავაგრძელებთ. ჩვენ არასამთავრობოებს მივაწვდით ყველა სახის ინფორმაციას, რაც ჩვენ გვაქვს. ქვეყანაში დაუსჯელობის სინდრომია, ამიტომ მუდმივად გვექნება ინფორმაციის გაცვლა”,- აღნიშნა მან.