ჩვენი პროგნოზებით გათვლა იყო ასეთი, რომ ახალი წლის წინა დღეებში თბილისში გრიპით ავადობა შემცირდებოდა და პიკი რაიონებში დაიწყებოდა, - ამის შესახებ ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ გრიპის ვირუსის გავრცელებასთან დაკავშირებით დასმული შეკითხვის პასუხად განაცხადა.

მისი თქმით, მას შემდეგ, რაც ავადობის მაჩვენებლები თბილისში შემცირდება, 2 კვირის შემდეგ კლება რეგიონებშიც დაიწყება. „როგორც კი ავადობის ზრდის ტენდენცია გაჩერდება, აქედან 2 კვირის განმავლობაში მისი კლება დედაქალაქში დაიწყება, ორკვირიანი ინტერვალის შემდეგ კი - რეგიონებში. გრიპის ის 6 სამწუხარო შემთხვევა, რომელიც გარდაცვალებით დასრულდა, მინიმუმ ერთ სხვა დაავადებასთან ერთად მიმდინარეობდა“, - აღნიშნა დავით სერგეენკომ.

მინისტრი კლინიკა „გორმედში“ 39 წლის ქალის სავარადუდოდ, H1N1-ით გარდაცვალებასაც გამოეხმაურა და განაცხადა, რომ პაციენტს გრიპის ვირუსთან ერთად, სხვა დაავადებაც ჰქონდა, რამაც მდგომარეობა დაამძიმა.

„ამ შემთხვევაში გარდაცვალება გამოიწვია გარკვეულმა დაავადებამ - ინფექციის გავრცელების პროცესში სხვა დაავადებაც იყო და ეს გახდა სიმძიმის განმსაზღვრელი. ზოგადად, 48 საათში დაწყებული მკურნალობა არის ეფექტური“, - აღნიშნა დავით სერგეენკომ.