საპარლამენტო უმრავლესობის წევრი ლევან კობერიძე უმრავლესობის დაშლის საფრთხეს ვერ ხედავს. მისივე თქმით, თუ ის რაიმე პოზიციას დააფიქსირებს, არ ნიშნავს, რომ რომელიმე გუნდის წევრია.

"გუნდის დაშლის საფრთხეს არ ვხედავ. ვხედავ იმ საფრთხეს, რომ მსჯელობა იყოს რაც შეიძლება საღი, გამჭვირვალე და ქვეყნის მომავალზე ორიენტირებული, რათა იუსტიციის უმაღლესი საბჭოს მხრიდან მსგავსი ფორმით წარმოდგენილი, ნახევარ საათში, ბნელ ან განათებულ ოთახში დაწერილი სია არ უნდა შემოდიოდეს.

ძალიან მნიშვნელოვანია, რომ ერთმანეთს ნებით თუ უნებლიედ იარლიყები არ მივაკეროთ. მე მაქვს ჩემი მკაფიოდ გამოხატული მოსაზრება. თუ ის ვინმეს მოსაზრებას ემთხვევა, ეს იქნება მამუკა მდინარაძე, ეკა ბესელია თუ სხვა, არ ნიშნავს, რომ რომელიმე ადამიანის ჯგუფს მივეკუთვნები. მე ვარ უმრავლესობის წევრი და მაქვს მკაფიო პოზიციები საკითხებზე, რომელსაც მუდამ ვაფიქსირებ. თუ ეკა ბესელია, მამუკა მდინარაძე ან სხვა ადამიანები რაიმე თავის ნაბიჯს გადადგამენ, ეს მათი უფლებაა",- განაცხადა კობერიძემ.