გრიპისა და გრიპის მსგავსი დაავადებების გავრცელების მაჩვენებელი 100 ათას მოსახლეზე 256-ია, რაც ერთი კვირის წინანდელ მაჩვენებლებთან შედარებით 21 ერთეულითაა შემცირებული, - ამის შესახებ “ინტერპრესნიუსს” დაავადებათა კონტროლის ეროვნული ცენტრის ხელმძღვანელმა ამირან გამყრელიძემ განუცხადა.

მისივე თქმით, გასული კვირა შედარებით მშვიდი იყო, რაც იანვრის დასაწყისისთვის დამახასიათებელია და ზამთრის არდადეგებს უკავშირდება.

„დღეს შეჯამდა გასული კვირის ეპიდსიტუაციის მონაცემები. გრიპისა და გრიპის მსგავსი დაავადებების გავრცელების მაჩვენებელი 100 ათას მოსახლეზე 256-ია, რაც ერთი კვირის წინანდელ მაჩვენებლებთან შედარებით 21 ერთეულითაა შემცირებული. ასევე, მძიმე რესპირატორული დაავადებების ჰოსპიტალიზაციის მაჩვენებელსაც ოდნავ შემცირების ტენდენცია აქვს. წინა კვირაში 41% იყო, გასულ კვირაში კი 33%. თუმცა, ეს პროცენტი მაღალია და სტაციონარებში გრიპის გართულებებით საკმაოდ მძიმე პაციენტები რჩებიან. აღნიშნულის მიზეზი კი სამედიცინო დაწესებულებებისადმი გვიანი მიმართვიანობაა", - განაცხადა გამყრელიძემ.