მთაწმინდის რაიონში, ჭონქაძის ქუჩაზე “ჯორჯიან უოთერ ენდ ფაუერი” წყალმომარაგების სისტემას აახლებს.
როგორც „ინტერპრესნიუსს“ GWP-დან აცნობეს, პროექტის ფარგლებში სრულად იცვლება 1 კმ სიგრძის წყალსადენის და წყალარინების მაგისტრალური ქსელი, სისტემის სტაბილურობისთვის ახალ ქსელზე ევროსტანდარტის ჩამკეტ-მარეგულირებელი ურდულები მონტაჟდება.
„ჭონქაძის ქუჩის N10-დან N14-ის ჩათვლით ინტენსიური სარეაბილიტაციო სამუშაოები დღეს, 17 იანვარს იწყება და თებერვლის ბოლოს დასრულდება. კომპანია "ჯორჯიან უოთერ ენდ ფაუერი" სამუშაოების შესახებ ინფორმაციას ეტაპობრივად გაავრცელებს.
სამუშაოების მიმდინარეობისას ჭონქაძის ქუჩის აღნიშნულ მონაკვეთზე საავტომობილო მოძრაობა დროებით შეიზღუდა. ტრანსპორტით მოძრაობა შესაძლებელი იქნება გერგეთის, ინგოროყვას და ჩიტაძის ქუჩებით.
ჭონქაძის ქუჩაზე, წყალმომარაგების სისტემის სარეაბილიტაციო სამუშაოების დასრულების შემდეგ, მთაწმინდის რაიონის გამგეობა ასფალტის ახალ საფარს დააგებს“, - ნათქვამია “ჯორჯიან უოთერ ენდ ფაუერის” მიერ გავრცელებულ ინფორმაციაში.