გერმანიაში, ქალაქ აახენში გერმანიის კანცლერმა ანგელა მერკელმა და საფრანგეთის პრეზიდენტმა ემანუელ მაკრონმა ორმხრივი თანამშრომლობის გაფართოების თაობაზე ახალ შეთანხმებას მოაწერეს ხელი.
მხარეებმა თანამშრომლობის გაღრმავება 15 სფეროში შეათანხმეს, რის განხორციელებასაც დაუყოვნებლივ შეუდგებიან.
დოკუმენტში ხაზგასმით აღნიშნულია, რომ „საფრანგეთისა და გერმანიისთვის დრო დადგა ორმხრივი ურთიერთობები ახალ დონეზე გაიყვანონ და მოემზადონ იმ გამოწვევებისთვის, რომელიც ორ ქვეყანასა და ევროპას წინაშე დგას 21-ე საუკუნეში“.
შეთანხმება ასევე ითვალისწინებს, რომ შეიარაღებული აგრესიის შემთხვევაში გერმანია და საფრანგეთი ერთმანეთს ყოველგვარ დახმარებასა და მხარდაჭერას აღმოუჩენენ, მათ შორის სამხედრო კუთხით. უსაფრთხოების სფეროში ქმედებების კოორდინირებისთვის შეიქმნება თავდაცვისა და უსაფრთხოების გერმანულ-ფრანგული საბჭო, რომლის ფარგლებში რეგულარულად გაიმართება შეხვედრები მაღალ დონეზე.
აახენის შეთანხმების ფარგლებში საფრანგეთი და გერმანია ვალდებულებას იღებენ გააფართოონ თანამშრომლობა ევროპული და შიდა პოლიტიკის სფეროში, მათ შორის ტერორიზმისა და ორგანიზებული დანაშაულის წინააღმდეგ. ერთობლივი დიპლომატიის პრიორიტეტად გამოცხადებულია გერმანიის გაერო-ს უშიშროების საბჭოში სრულუფლებიან წევრად მიღება. ასევე დაგეგმილია თანამშრომლობის გაღრმავება ეკონომიკის, განათლების, გარემოს დაცვის, სოციალური უზრუნველყოფისა და სხვა სფეროებში.