ივანე მაჭავარიანი - 15 თებერვლიდან, ბიზნესი დღგ-ს ზედმეტობას ავტომატურ რეჟიმში დაიბრუნებს

15 თებერვლიდან ბიზნესი დღგ-ს ზედმეტობას ავტომატურ რეჟიმში დაიბრუნებს, - განაცხადა საქართველოს ფინანსთა მინისტრმა ივანე მაჭავარიანმა თბილისში მიმდინარე ეკონომიკურ კონფერენციაზე „საქართველო და მსოფლიო 2019 წელს“.

როგორც მან აღნიშნა, გასულ წლებში საგადასახადო ორგანოები კონსერვატიულად უდგებოდნენ დღგ-ს ზედმეტობის დაბრუნების პროცესს, რაც ბიზნესში იწვევდა იმის განცდას, რომ დღგ-ს უკან დაბრუნების მოთხოვნა აუცილებლად დასრულდებოდა საგადასახადო შემოწმებით.

„2018 წელი სწორედ ამ სტერეოტიპის დამსხვრევის წლად შეიძლება ჩაითვალოს, რასაც ადასტურების ის ფაქტიც, რომ ამ წელს უპრეცედენტოდ დიდი თანხა იქნა უკან დაბრუნებული (521 მლნ ლარი). 2019 წლის 15 თებერვლიდან, ანუ იანვრის თვის დელარაციების მიხედვით, დღგ-ს დაბრუნების პროცესი ხდება ავტომატური, რაც გულისხმობს, ყოველგვარი გადამოწმება-შემოწმების გარეშე, მოთხოვნილი თანხის ავტომატურ რეჟიმში დაბრუნდებას 24 საათის განმავლობაში. შემოსავლების სამსახურის ელექტრონული სისტემა, ავტომატურად დაამუშავებს ყველა წარდგენილ დეკლარაციას და რისკების მართვის ავტომატიზირებული სისტემის საშუალებით გაფილტრავს იმ კომპანიებს, რომლებსაც ავტომატურად დაუბრუნდებათ მოთხოვნილი თანხა. ასეთი კომპანიების რაოდენობა, ზედმეტობის მქონე კომპანიების მინიმუმ 90% იქნება. აღნიშნული პრაქტიკულად გამორიცხავს ადამიანური ფაქტორის ჩართულობას ან რაიმე გავლენის მოხდენას დაბრუნების პროცესზე,“ - განაცხადა ფინანსთა მინისტრმა ივანე მაჭავარიანმა ეკონომიკური კონფერენციის ფარგლებში მიმდინარე პანელზე „ინოვაციური რეფორმები ფინანსურ სექტორში“.

კონფერენცია „საქართველო და მსოფლიო 2019 წელს“ დღეს გაიხსნა. კონფერენცია პრემიერ-მინისტრმა მამუკა ბახტაძემ გახსნა და მას საქართველოს მთავრობის, დიპლომატიური კორპუსის, საერთაშორისო ორგანიზაციების, ბიზნესისა და აკადემიური სფეროს წარმომადგენლები ესწრებიან.

ვალერი სოლოვეი - კრემლის ქმედებების მოაზროვნე გამმართლებლები, ვინც საქართველოს საქმეებში ჩახედულია, თვლიან, რომ რუსეთს აღარ შეუძლია საქართველოს  პოლიტიკაზე გავლენის მოხდენა
ქართული პრესის მიმოხილვა 21.08.2019
ვახტანგ ძაბირაძე -  შემოდგომა იქნება ოპოზიციურ ფლანგზე ძალების ჩამოყალიბების პროცესი, ამიტომ არ მაქვს მოლოდინი, რომ ცხელი შემოდგომა გვექნება
პრემიუმ ხარისხის მინების ყველაზე მსხვილი იმპორტიორი კომპანია „ჯეო გლასს“ საკუთარ მომხმარებლებს სიახლეს სთავაზობს
პროექტ „ბათუმი რივიერასთან“ დაკავშირებით „სილქროუდ ჯგუფი“ განცხადებას ავრცელებს