აბასთუმანში, მას შემდეგ, რაც მის რამდენიმე დასახლებაში გენგეგმით განსაზღვრულ არეალებში იქნება შესაძლებელი უფრო დიდი ზომის განაშენიანება, დაახლოებით 5000-6000 სასტუმრო ადგილის შექმნა იქნება შესაძლებელი, - ამის შესახებ რეგიონული განვითარებისა და ინფრასტრუქტურის მინისტრმა, მაია ცქიტიშვილმა თბილისის ტექნოპარკში კონფერენციაზე „საქართველო და მსოფლიო 2019“ განაცხადა.
მისი თქმით, ამ ეტაპზე მუშავდება აბასთუმნის განვითარების გენერალური გეგმა, რომელიც იქნება მზად წელს.
„რას ვაკეთებთ ჩვენ ინფრასტრუქტურის სახით, რომ ბიზნესის შემოსვლასაც შევუწყოთ აბასთუმანში ხელი? პირველ რიგში, მუნიციპალური განვითარების ფონდის მეშვეობით, მსოფლიო ბანკის რეგიონული განვითარების პროგრამის ფარგლებში ხდება 40-ზე მეტი ისტორიული სახლის აღდგენა, ფასადების რეაბილიტაციას ვაკეთებთ, თუმცა ისევ და ისევ ადამიანებს, რომლებიც დღეს ამ სახლებში ცხოვრობენ, აქვთ შესაძლებლობა, მცირე ბიზნესი განავითარონ და უფრო მსხვილ ბიზნესს შეუძლია, გამოისყიდონ სახლები, შესთავაზონ პირობები და რა თქმა უნდა, ააშენონ ახალი სასტუმროები უკვე გენგეგმის შესაბამისად. მუნიციპალური განვითარების ფონდის სახით გვაქვს სახლების რეაბილიტაციის პროექტი, სრული აღდგენა ხორციელდება ჩვენი ისტორიული ობსერვატორიის, სადაც ტურისტული ინფრასტრუქტურა ეწყობა, მათ შორის კაფე, ხდება ტელესკოპის აღდგენაც და საბაგიროს აღდგენაც, რომელიც აბასთუმნიდან ადის ობსერვატორიამდე. ამას გარდა, მთლიანად კურორტზე წესრიგდება საინჟინრო კომუნიკაციები”, - განაცხადა ცქიტიშვილმა.