აშშ-ს პრეზიდენტის დონალდ ტრამპისა და ჩრდილოეთ კორეის ლიდერის კიმ ჩენ ინის მეორე შეხვედრა 27-28 თებერვალს ვიეტნამში გაიმართება. ამის შესახებ აშშ-ს პრეზიდენტმა დონალდ ტრამპმა კონგრესის წინაშე „ქვეყანაში არსებული მდგომარეობის“ შესახებ ყოველწლიური მიმართვისას განაცხადა.

„კიმ ჩენ ინი და მე კვლავ შევხვდებით ერთმანეთს 27-28 თებერვალს ვიეტნამში“, - განაცხადა დონალდ ტრამპმა, რომელსაც არ დაუზუსტებია თუ რომელ ქალაქში გაიმართება აღნიშნული შეხვედრა.

აშშ-ს პრეზიდენტის თქმით, ამჟამად აშშ „ახალ ისტორიულ მცდელობას ახორციელებს კორეის ნახევარკუნძულზე მშვიდობის მისაღწევად“.

„მე რომ პრეზიდენტი არ გავმხდარიყავი, დღეს, ჩემი აზრით, ჩრდილოეთ კორეასთან დიდი ომის მდგომარეობაში ვიქნებოდით, რომელშიც პოტენციურად მილიონობით ადამიანი დაიღუპებოდა“, - აღნიშნა ამერიკის ლიდერმა.

შეგახსენებთ, რომ დონალდ ტრამპსა და კიმ ჩენ ინს შორის პირველი შეხვედრა 2018 წლის 12 ივნისს სინგაპურში გაიმართა.