აშშ-ს პრეზიდენტმა დონალდ ტრამპმა განაცხადა, რომ ჩრდილოეთ კორეისთვის სანქციების მოხსნა სურს, თუმცა საამისოდ ამ ქვეყნის ხელისუფლებამ ნაბიჯები უნდა გადადგას.

„აშშ-ს სანქციები ჯერ კიდევ ძალაშია. მსურს ამ სანქციების მოხსნა, თუმცა საამისოდ ჩრდილოეთ კორეის მხრიდან გადადგმული ნაბიჯები უნდა დავინახო“, - განუცხადა ჟურნალისტებს აშშ-ს პრეზიდენტმა.

დონალდ ტრამპის თქმით, ჩრდილოეთ კორეას ძალიან დიდი ეკონომიკური პოტენციალი აქვს.

„არა მგონია, რომ ეს ჩვენი ბოლო შეხვედრა იქნება. ჩვენ ძალიან კარგი ურთიერთობები გვაქვს“, - დასძინა ტრამპმა.

შეგახსენებთ, რომ აშშ-სა და ჩრდილოეთ კორეის ლიდერების მეორე შეხვედრა 27-28 თებერვალს ვიეტნამში გაიმართება.