სს „ელმავალმშენებელი ქარხნის“ მუშების მიერ ორგანიზებულ საპროტესტო აქციაზე შეკამათება მოხდა. კამათი ქარხნის მუშებსა და ჯანდაცვის სამინისტროს მიერ დანიშნულ მედიატორს შორის მოხდა.

დღეს, 11:00 საათზე მუშების წარმომადგენლებს, საწარმოს ხელმძღვანელობასა და ჯანდაცვის სამინისტროს მიერ დანიშნულ მედიატორს შორის შეხვედრა უნდა ჩატარებულიყო, თუმცა ქარხნის ტერიტორიაზე მხოლოდ მედიატორი შევიდა. მედიატორისა და ქარხნის ხელმძღვანელობის შეხვედრა დაახლოებით ერთი საათი გაგრძელდა, რის შემდეგაც მედიატორმა მუშებს განუცხადა, რომ ხელმძღვანელობა მზად არის მათ შეხვდეს, ოღონდ მედიის გარეშე. ამ საკითხმა კამათი გამოიწვია.

ამ წუთებისთვის მუშები ხელმძღვანელობასთან შეხვედრას კვლავ ითხოვენ და აცხადებენ, რომ მზად არიან მედიის წარმომადგენლების გარეშე მოისმინონ ხელმძღვანელობის პოზიცია.