პროკურორი - მამუკა ხაზარაძემ განაცხადა, რომ წერილი შუამავლის მეშვეობით მიიღო
მამუკა ხაზარაძემ განაცხადა, რომ წერილი მან შუამავლის მეშვეობით მიიღო, - ამის შესახებ ჟურნალისტებს პროკურორმა არჩილ ტყეშელაშვილმა განუცხადა.
მისივე თქმით, მამუკა ხაზარაძემ წარადგინა ელექტრონული ვერსიით დაბეჭდილი წერილი, რომელსაც არანაირი მაიდენტიფიცირებელი ნიშანი არ აქვს.
„მამუკა ხაზარაძემ სასამართლოზე წარმოადგინა ჩვეულებრივი ნაბეჭდი ფურცელი, რომლის შედგენა ნებისმიერ ადამიანს შეუძლია, ამ წერილში რაიმე მაიდენტიფიცირებელი ნიშნები არ ჩანს. როგორც ხაზარაძემ განაცხადა, წერილი მან მიიღო შუამავლის მეშვეობით. როდესაც ჩვენ ვეკითხებით შუამავლის დასახელებას, ჩვენთვის გაუგებარი მიზეზით, ის შუამავალს არ ასახელებს. რაც შეეხება მის შინაარსს, წერილი ჯერჯერობით ჩვენ არ გადმოგვცემია და ამაზე ვერაფერს გეტყვით. სწორედ წერილის გაცნობის შემდგომ დაიგეგმება, თუ რას განახორციელებს პროკურატურა. ჩვენ ყველა საჭირო საგამოძიებო მოქმედებას განვახორციელებთ“, - განაცხადა პროკურორმა არჩილ ტყეშელაშვილმა.
შეგახსენებთ, რომ მამუკა ხაზარაძემ გუშინ საკომიტეტო მოსმენაზე განაცხადა, რომ შინაგან საქმეთა მინისტრმა გიორგი გახარიამ წინასაარჩევნო პერიოდში მას მუქარის შემცველი წერილი გაუგზავნა.
თავად გიორგი გახარია კი აცხადებს, რომ „წერილებს არ წერს და სათქმელს ყველას პირში ეუბნება“. შინაგან საქმეთა მინისტრი ასევე მზაობას გამოთქვამს, მან ყველა არსებულ კითხვას საკანონმდებლო ორგანოში უპასუხოს.
