ნებისმიერი თანმდევი პროცესი, რომელიც ამ საქმეს უკავშირდებოდა იქნება გამოძიებული, - ამის შესახებ პარლამენტის თავმჯდომარემ ირაკლი კობახიძემ „თიბისი ბანკის“ საქმესა და მამუკა ხაზარაძის მიერ გაკეთებული განცხადებების შეფასებისას განაცხადა. პარლამენტის თავმჯდომარის განცხადებით, არის სურვილი, რომ საკითხი პოლიტიკურ ჭრილში გადავიდეს, რაც დაუშვებელია, ვინაიდან ის მთლიანად სამართლებრივი მიმართულებისაა.
ირაკლი კობახიძე პოლიტიკურ სპეკულაციად აფასებს „ევროპული საქართველოს“ ინიციატივას, საკითხზე საგამოძიებო კომისიის შექმნასთან დაკავშირებით და აღნიშნავს, რომ მსგავსი ინიციატივები გამოძიების დაწყების პირველივე ეტაპზე მიუღებელია.
„ნებისმიერი თანმდევი პროცესი, რომელიც ამ საქმეს უკავშირდებოდა იქნება გამოძიებული. ჩვენთვის მთავარია ეს ყველაფერი არ გადავიდეს პოლიტიკურ ჭრილში. ამის ყველანაირი მცდელობაა, მათ შორის ის, რომ ოპოზიციამ საგამოძიებო კომისიის შექმნა დააინიცირა, მაშინ როდესაც საგამოძიებო პროცედურები ახლაა დაწყებული. ეს არის პოლიტიკური სპეკულაციები და ჩვენ არ გვინდა, რომ ეს საკითხი გასცდეს სამართლებრივ ჩარჩოებს“, - განაცხადა ირაკლი კობახიძემ.