საავიაციო უსაფრთხოების ევროპული სააგენტო (EASA) აპირებს, თვითმფრინავის მოდელის - Boeing 737 Max 8-ის ექსპლუატაცია აკრძალოს, რომელიც რამდენიმე დღის წინ ეთიოპიაში ჩამოვარდა. ამის შესახებ „ბლუმბერგი“ საკუთარ წყაროებზე დაყრდნობით იუწყება.

დიდი ბრიტანეთის სამოქალაქო ავიაციის სამმართველო უკვე შეუერთდა იმ ქვეყნებს, რომლებმაც თვითმფრინავის აღნიშნულ მოდელს თავის საჰაერო სივრცეში ფრენა აუკრძალეს.

აღნიშნული მოდელის ფრენა, ასევე, შეზღუდეს საკუთარ საჰაერო სივრცეში გერმანიამ, საფრანგეთმა და ირლანდიამ. თავდაპირველად ამ ტიპის თვითმფრინავზე შეზღუდვა მალაიზიის სამოქალაქო ავიაციის სამმართველომ შემოიღო.

შეგახსენებთ, 10 მარტს ეთიოპიაში „Ethiopian Airlines“-ის კუთვნილმა თვითმფრინავმა „Boeing 737“-მა კატასტროფა განიცადა, რომლის ბორტზე მყოფი 157-ვე ადამიანი დაიღუპა.