„ევროპული საქართველოს" წევრის გიგა ბოკერიას მიერ საგარეო საქმეთა მინისტრის მისამართით დასმულ კითხვებს კომიტეტების გაერთიანებულ სხდომაზე მცირე ხმაური მოჰყვა. საგარეო ურთიერთობათა კომიტეტის თავმჯდომარე სოფიო ქაცარავამ გიგა ბოკერიას მოუწოდა, არსებული წესის მიხედვით დაესვა ყველა შეკითხვა, რაც მას ჰქონდა და შემდეგ დალოდებოდა მინისტრის პასუხებს. გიგა ბოკერიამ დავით ზალკალიანს იმის შესახებ დაუსვა კითხვა, რატომ არ არის 8 თვის განმავლობაში საფრანგეთში საქართველოს ელჩი დანიშნული მაშინ, როდესაც 2019-2022 წლების საგარეო პოლიტიკის სტრატეგიის დოკუმენტში კოსმოსის აქტიურ მილიტარიზაციაზეა საუბარი. მანამდე ბოკერიამ მინისტრს „ოთხოზორია-ტატუნაშვილის სიის“ შესახებ ჰკითხა.
გიგა ბოკერიას მიერ დასმულმა კითხვებმა უმრავლესობის სხვა დეპუტატების უკმაყოფილებაც გამოიწვია, რაზეც ბოკერიამ მათ მოუწოდა, ნუ ჩაერეოდნენ მისთვის გამოყოფილ დროში.
„მე რა და როგორ მაინტერესებს, ამას მე განვსაზღვრავ. მე ხომ არ ვერევი თქვენს უაღრესად მწვავე კითხვებში. ჩემი დროა და ნუ ჩაერევით. ჩვენ და მინისტრი გადავწყვეტთ თვითონ,"- მიმართა ბოკერიამ უმრავლესობის დეპუტატებს.
„თქვენ რით ხართ სხვებისგან განსხვავებული, გამაგებინეთ. თქვენს დროს გაცდით. როგორც შევთანხმდით ყველასთან, ისე დასვით სამ-სამი კითხვა და გასცემს მინისტრი პასუხს," - მიმართა სოფიო ქაცარავამ გიგა ბოკერიას.