დღეს, 17:00 საათზე, ოკუპირებული ტერიტორიებიდან დევნილთა, შრომის ჯანმრთელობისა და სოციალური დაცვის სამინისტროში, მედიაციის ფარგლებში სოციალურ მუშაკებთან, გაფართოებული შეხვედრა გაიმართება. რომელსაც ასევე სოციალური მუშაკების მიერ დასახელებული წარმომადგენლები დაესწრებიან.

უწყების ცნობით, შეხვედრაზე განხილული იქნება ყველა ის აქტუალური საკითხი, რაც სოციალურ მუშაკებს წარმოდგენილი აქვთ მედიაციის პროცესის ფარგლებში.

მინისტრის მოადგილის თამარ ბარკალაიას განცხადებით, გავრცელდა არასწორი ინფორმაცია, სოციალურ მუშაკებთან ორ პარალელურ შეხვედრასთან დაკავშირებით, რაც არ შეესაბამება სინამდვილეს.

„შეხვედრა არის ერთი, მხოლოდ მედიაციის ფარგლებში, რომელსაც დავესწრები მე, ასევე სოციალური მომსახურების სააგენტოს ხელმძღანელობა, როგორც დამსაქმებელი, მედიატორი და ყველა ის სოციალური მუშაკი, რომელიც ჩართულია მედიაციის პროცესში“, - აცხადებს თამარ ბარკალაია.

ოკუპირებული ტერიტორიებიდან დევნილთა, შრომის ჯანმრთელობისა და სოციალური დაცვის სამინისტროში აცხადებენ, რომ არანაირი პარალელური შეხვედრა უწყებაში დაგეგმილი არ ყოფილა. დღეს მედიაციის ფარგლებში გაფართოებულ შეხვედრას სოცმუშაკები საქართველოს სხვადასხვა რეგიონებიდან დაესწრებიან.