ჩემი შეფასებით, როგორც რიგითი მოქალაქე, ვინც არ უნდა გააკეთოს მსგავსი ტიპის დანაშაული, ის უვადო პატიმრობას იმსახურებს, - ამის შესახებ სმიტების ოჯახის მკვლელობაში ბრალდებულის მალხაზ კობაურის ადვოკატმა ლექსო კობაიძემ რადიო „პალიტრის“ ეთერში განაცხადა.

კობაიძე მიჩნევს, რომ ჩადენილი დანაშაული მძიმეა, თუმცა ის დარწმუნებულია, რომ აღნიშნულ ქმედებაში მალხაზ კობაური უდანაშაულოა.

„პირდაპირ მინდა ვთქვა, რომ უვადო პატიმრობას ველოდებით. ჩემი შეფასებით, როგორც რიგითი მოქალაქე, ვინც არ უნდა ჩაიდინოს მსგავსი ტიპის დანაშაული, ის უვადო პატიმრობას იმსახურებს. თუმცა, მე მჯერა, რომ ეს დანაშაული მალხაზ კობაურს არ ჩაუდენია. მას საერთოდ სასჯელი არ ეკუთვნოდა“, - განაცხადა ლექსო კობაიძემ.

ხადას ხეობაში სმიტების ოჯახის სამი წევრის მკვლელობაში ბრალდებულ მალხაზ კობაურს ნაფიცმა მსაჯულებმა გამამტყუნებელი ვერდიქტი გამოუტანეს. კობაური ნაფიცმა მსაჯულებმა წარდგენილ ყველა ბრალში ერთხმად დამნაშავედ სცნეს, მათ შორის გაუპატიურებაში.

მსაჯულები სათათბირო ოთახში 4 საათი მსჯელობდნენ. მალხაზ კობაურს ბრალი სისხლის სამართლის კოდექსის 109-ე მუხლის პირველი ნაწილის „გ“, მე-2 ნაწილის „ბ“, მე-3 ნაწილის „ა“ და „ბ“ ქვეპუნქტებით და 137-ე მუხლის პირველი ნაწილით ჰქონდა წარდგენილი, რაც განზრახ მკვლელობას სხვა დანაშაულის გაადვილებისა და დაფარვის მიზნით, სამი პირის განსაკუთრებული სისასტიკით მკვლელობას, წინასწარი შეცნობით არასრულწლოვნის მიმართ მკვლელობასა და გაუპატიურებას გულისხმობს. აღნიშნული დანაშაული 16-დან 20-წლამდე, ან უვადო პატიმრობას ითვალისწინებს.