რუსეთისთვის უკეთესი იქნებოდა 2016 წლის საპრეზიდენტო არჩევნებზე ჰილარი კლინტონს გაემარჯვა. ამის შესახებ აშშ-ს პრეზიდენტმა დონალდ ტრამპმა ტელეარხ Fox News-სთვის მიცემულ ინტერვიუში განაცხადა.
„არავის არასოდეს გამოუჩენია რუსეთთან მიმართებაში ისეთი სიხისტე, როგორიც მე გამოვიჩინე. არავინ ახლოსაც კი არ ყოფილა. მიუხედავად ამისა, გვსურს, რომ რუსეთთან კარგი ურთიერთობები გვქონდეს. გვსურს კარგი ურთიერთობები ჩინეთთან. ეს გონივრულია და ეს კარგი იქნება ჩვენთვის“, - განაცხადა დონალდ ტრამპმა.
აშშ-ს პრეზიდენტმა ასევე აღნიშნა, რომ „რუსეთს მასზე რაიმე მასალა რომ ჰქონოდა, ეს არჩევნებამდე იქნებოდა გამოქვეყნებული“.
„რუსეთისთვის უკეთესი იქნებოდა ჰილარი კლინტონი რომ გამხდარიყო პრეზიდენტი, ენერგეტიკის, ნავთობისა და გაზის საკითხების თვალსაზრისით“, - განაცხადა მან.