კობახიძის კანონპროექტი არის ნაბიჯი და სურვილი გაკონტროლდეს სასამართლო ხელისუფლება დაახლოებით ისე, როგორც თავის დროზე მიხეილ სააკაშვილი აკონტროლებდა სასამართლო ხელისუფლებას, - ამის შესახებ პარლამენტის დამოუკიდებელმა დეპუტატმა ლევან გოგიჩაიშვილმა, ვენეციის კომისიის წევრებთან გამართული შეხვედრის შემდეგ განაცხადა.

გოგიჩაიშვილი მიიჩნევს, რომ მმართველი გუნდი საკმაოდ უხერხულ მდგომარეობაშია, რადგან მოიწვიეს ვენეციის კომისია საკუთარი კანონპროექტის შესაფასებლად, თუმცა აღნიშნულ პროექტზე გადაწყვეტილება მათ უკვე გამზადებული დაახვედრეს.

“პროცესი არის საინტერესო და მნიშვნელოვანი, თუ გავითვალისწინებთ კონტექსტს, თუ რატომ მოხდა დღეს ამ ადამიანებთან შეხვედრა. ისინი მოიწვია პარლამენტის თავმჯდომარემ, მაგრამ ძალიან უხერხული მდგომარეობა შეიქმნა, როდესაც ფაქტობრივად, დაუძახეს ადამიანებს და გადაწყვეტილება დაახვედრეს. რა თქმა უნდა, ამას ისინი ღიად არ აფიქსირებენ, მაგრამ დიდი უხერხულობის გრძნობას უტოვებს. ჩვენთვის ეს პროცესი, რომელსაც აწარმოებს უმრავლესობა, არასწორია და მიმართულია ხელისუფლების მიერ სასამართლო ხელისუფლების გაკონტროლებისაკენ. ეს არის ნაბიჯი და სურვილი გაკონტროლდეს სასამართლო ხელისუფლება დაახლოებით ისე, როგორც თავის დროზე მიხეილ სააკაშვილი აკონტროლებდა სასამართლო ხელისუფლებას. ეს არის ძალიან საშიში და სახიფათო პროცესი და ეს სახიფათო თამაში წამოიწყო „ქართულმა ოცნებამ“. სამწუხაროდ, ვერ შევძელით ამ პროცესის გაჩერება, არაერთი მცდელობისა და საუბრებისა დიდი ხნის განმავლობაში, როგორც პარტიის შიგნით, ასევე, მას შემდეგ, რაც დავტოვეთ უმრავლესობა. რეალურად, ისევ იმ წრეზე ვტრიალებთ და ვერ გამოვედით იმ მოჯადოებული წრიდან, როდესაც ხელისუფლებებს ვერ ავაღებინეთ ხელი სასამართლოზე კონტროლის სურვილისგან. ჩვენ ამ ქვეყნაში გვჭირდება დამოუკიდებელი სასამართლო, რომელიც არის ძალიან ბევრი რამის გარანტი”,- განაცხადა გოგიჩაიშვილმა.