პარლამენტის თავმჯდომარის მოადგილე ზვიად ძიძიგური საქართველოში ვიზიტით მყოფ აზერბაიჯანის რესპუბლიკის დიასპორასთან მუშაობის სახელმწიფო კომიტეტის თავმჯდომარეს, ფუად მურადოვს შეხვდა - ამის შესახებ „ინტერპრესნიუსს“ საქართველოს პარლამენტიდან აცნობეს.

მათივე ინფორმაციით, მხარეებმა ისაუბრეს საქართველოსა და აზერბაიჯანს შორის სხვადასხვა სფეროში არსებულ ორმხრივ თანამშრომლობაზე და მათი გაღრმავების პერსპექტივებზე.

„თემები, რომლებზეც ჩვენ ვისაუბრეთ შეეხებოდა კულტურისა და განათლების სფეროში თანამშრომლობას, ჩვენს ეთნიკურად აზერბაიჯანელ მოქალაქეებსა და აზერბაიჯანში მცხოვრებ ქართველ მოქალაქეებს. ეს არის ტრადიციული თემები თანამშრომლობის გაღრმავების მიმართულებით. ვფიქრობ, რომ ჩვენი თანამშრომლობის გაღრმავებისთვის უფრო მეტი გასაკეთებელი წინ გვაქვს. ამ მიმართულებით ორივე სახელმწიფოს კეთილი ნება არსებობს და ეს არის შეუქცევადი პროცესი“,-განაცხადა პარლამენტის თავმჯდომარის მოადგილემ, ზვიად ძიძიგურმა შეხვედრის კომენტირებისას.

ზვიად ძიძიგურის აზერბაიჯანის რესპუბლიკის დიასპორასთან მუშაობის სახელმწიფო კომიტეტის თავმჯდომარესთან ფუად მურადოვს შეხვედრას ქართული მხრიდან ესწრებოდნენ საქართველოს პარლამენტის წევრები: ბექა ოდიშარია, მახირ დარზიევი და აზერ სულეიმანოვი.