დაგვისახელეთ სხვა პრეცედენტი, როდესაც თქვენი ხელმძღვანელობის პერიოდში ეროვნულმა ბანკმა 10 წლის წინანდელ ტრანზაქციაზე მოკვლევა დაიწყო, - ამ კითხვით „ნაციონალური მოძრაობის“ წევრმა თინა ბოკუჩავამ პლენარულ სხდომაზე ეროვნული ბანკის პრეზიდენტს მიმართა. დეპუტატმა კობა გვენეტაძეს „თიბისი ბანკის“ საქმის გარდა, სხვა პრეცედენტის დასახელება იმის გამო სთხოვა, რომ გაიფანტოს ეჭვები იმასთან დაკავშირებით, რატომ გადამოწმდა 2008 წლის ტრანზაქცია ახლა.

„დაგვისახელეთ სხვა პრეცენდენტი, როდესაც თქვენი ხელმძღვანელობის პერიოდში ეროვნულმა ბანკმა 10 წლის წინანდელ ტრანზაქციაზე მოკვლევა დაიწყო და მოხდა ბანკის სანქცირება. ერთი პრეცენდენტი ხომ მაინც უნდა დაგვისახელოთ, თუ გნებავთ, რომ დაგვაჯეროთ, რომ ბატონ კობა გვენეტაძეს და მონიტორინგის სამსახურს 2018 წელს სრულიად შემთხვევით გაახსენდა „თიბისი ბანკის“ 2008 წლის ტრანზაქცია. ეს ეჭვები რომ გაიფანტოს, რამდენიმე მაგალითი მაინც უნდა დაგვისახელოთ სხვა ასეთი შემთხვევებისა,“ - მიმართა ბოკუჩავამ გვენეტაძეს.