დღეს საქართველოში არცერთი პირი არ არის დაცული, მათ შორის, ბიძინა ივანიშვილის მოკავშირეები. როგორც კი მას გადაუტრიალდება ტვინი, თქვენი პირადი ცხოვრება და ქონება იქნება საფრთხის ქვეშ,- ასე მიმართა „ევროპული საქართველოს“ წევრმა სერგო რატიანმა საპარლამენტო უმრავლესობის წევრებს პარლამენტის სესიაზე.

დეპუტატის თქმით, „თიბისი ბანკის“ საქმემ აჩვენა, რომ ქვეყანაში დაცული არავინ არის, მათ შორის, არც ინვესტორები.

„დღევანდელმა დღემაც აჩვენა, რომ „თიბისი ბანკთან“ დაკავშირებით განვითარებული მოვლენები აჩვენებს შემდეგ ტენდენციებს - ის, რომ დღეს საქართველოში არცერთი პირი არ არის დაცული, დაწყებული ბიძინა ივანიშვილის მოკავშირეებიდან, როგორც კი მას გადაუტრიალდება ტვინი, თქვენი პირადი ცხოვრება და ქონება იქნება საფრთხის ქვეშ. დაუცველია ჩვენი ბიზნესი და ეკონომიკა. თუ მამუკა ხაზარაძეს და ბადრი ჯაფარიძეს დღეს შეექმნათ პრობლემა და ბიძინა ივანიშვილს შეუძლია გადაუაროს, იმედია, ამას ვერ მოახერხებს, დაცული არავინ არის. დაუცველები არიან ის ინვესტორებიც, რომლებიც შემოვიდნენ საქართველოში და ეს არის ის გზავნილი, რომელიც რუსმა ოლიგარქმა ყველა ინვესტორს გაუგზავნა, რომელიც შეიძლება შემოსულიყო საქართველოში. შესაბამისად, დაუცველია ბიზნესი, კერძო პირი და საქართველოს უსაფრთხოება“,- განაცხადა რატიანმა.

პარლამენტის პლენარულ სხდომაზე ეროვნული ბანკის პრეზიდენტს კობა გვენეტაძეს მოუსმინეს.