ემზარ საბანაძე - არ არის გამორიცხული, რუსეთმა ტარიელ ონიანი საქართველოს საზღვრებს მოაყენოს - ჩვენი კონტრდაზვერვა და სუს-ი ფხიზლად უნდა იყოს
რუსები ყველანაირად შეეცდებიან ე.წ. კანონიერი ქურდის ტარიელ ონიანის გამოყენებას. ჩვენი კონტრდაზვერვა და სუს-ი ფხიზლად უნდა იყოს, - ამის შესახებ პენიტენციური სისტემის რეფორმის ეროვნული ასოციაციის პრეზიდენტი ემზარ საბანაძე „კვირის პალიტრასთან“ ინტერვიუში აცხადებს.
როგორც საბანაძე აღნიშნავს, „თუ რუსები ონიანს შემოგვიგდებენ, აჯობებს, ჩვენმა სამართალდამცველებმა ქვეყნიდან გაუშვან, ვინაიდან ონიანი ჩვენს ძალოვნებს დიდ პრობლემებს შეუქმნის“.
„ონიანი ასაკშია, ახლა ახალი თაობის ავტორიტეტები წამოვიდნენ და როგორ მოახერხებს ძველი გავლენის დაბრუნებას, ვერ გეტყვით. მურტალოსი არ იყოს, საქართველო არ შეაწუხოს, თორემ სხვაგან რაც უნდა, ის გაუკეთებია. თუ გახსოვთ, ქურდებს "დედ ჰასანის" დასაფლავება ლოტკინის სასაფლაოზე უნდოდათ, მერე ერთმა მაღალჩინოსანმა "თავისი სიტყვა თქვა" და "დედ ჰასანი" თვითმფრინავით მოსკოვში გადაასვენეს. ვფიქრობ, ეს საკითხიც ანალოგიურად გადაწყდება. არ ვამბობ, რომ ონიანი მძიმე წონის ავტორიტეტი არ არის, მან ქიციც იცის და ქიცმაცურიც, სხვათა შორის, ისიც, რომ ახლა სხვა დროა. შესაძლოა, უკრაინაში ჩავიდეს. უკრაინაში ქურდები უფრო აქტიურად მონაწილეობენ პოლიტიკურ გადათამაშებებში, ვიდრე საქართველოში. ჩვენს ქვეყანაში მათ იმხელა წონა არა აქვთ. არსებობს ინფორმაცია, რომ ონიანი იგორ კალამოისკისთან მეგობრობს. არც ის არის გამორიცხული, რუსეთის ფედერაციამ ონიანი საქართველოს საზღვრებს მოაყენოს, მაგრამ ჩვენი შს მინისტრი არ არის ის კაცი, ზოგიერთმა "კუკლა" გაუჩალიჩოს“, - განაცხადა საბანაძემ.
საბანაძე არ გამორიცხავს, რომ ონიანი საქართველოში 19 მაისს დანიშნული შუალედური არჩევნებისთვის გამოიყენონ.
„საქმე ის არის, რომ ზუგდიდის შუალედურ არჩევნებში სანდრა რულოვსი იყრის კენჭს, რომელიც სააკაშვილთან ასოცირდება. მან სწორედ ონიანი გამოიყენა 2004 წლის არჩევნებში. თუ რუსები ონიანს შემოგვიგდებენ, აჯობებს, ჩვენმა სამართალდამცველებმა ქვეყნიდან გაუშვან, ვინაიდან ონიანი ჩვენს ძალოვანებს დიდ პრობლემებს შეუქმნის. რუსები ყველანაირად შეეცდებიან ონიანის გამოყენებას. ჩვენი კონტრდაზვერვა და სუს-ი ფხიზლად უნდა იყვნენ“, - აცხადებს საბანაძე.
ცნობისთვის, ტარიელ ონიანი რუსეთში გამოძალვისა და ადამიანის გატაცების გამო 2010 წელს მისჯილ 10-წლიან სასჯელს ორენბურგის ოლქში, მკაცრი რეჟიმის კოლონია Чёрный дельфин-ში იხდის. ის ესპანეთისა და რუსეთის მოქალაქეა. რუსული მედიის ცნობით, ონიანმა საქართველოს მოქალაქეობაზე უარი რამდენიმე წლის წინ თქვა. ის ციხიდან დღეს გათავისუფლდა.
