ევროსაბჭოში საქართველოს პრემიერ-მინისტრს მამუკა ბახტაძეს საქართველოს ტერიტორიიდან გაუჩინარებული აზერბაიჯანელი ჟურნალისტის აფგან მუხთარლის გატაცების საქმესა და მიმდინარე გამოძიებაზე დაუსვეს კითხვა.

„გაგიგზავნიათ თუ არა ოდესმე თქვენი ელჩი აზერბაიჯანში აფგან მუხთარლის მდგომარეობის გასაგებად და ჩაგიტარებიათ თუ არა ოდესმე გამოძიება მის გატაცებაზე“, - ჰკითხა ევროსაბჭოს საპარლამენტო ასამბლეის წევრმა მამუკა ბახტაძეს.

როგორც საქართველოს პრემიერ-მინისტრმა დასმული კითხვის პასუხად განაცხადა, აფგან მუხთარლის თემა ძალიან სენსიტიური საკითხია. მან ასევე დასძინა, რომ აფგან მუხთარლის საქმეზე გამოძიება მიმდინარეობს და ის შეფასებას მხოლოდ გამოძიების დასრულების შემდეგ გააკეთებს.

"აფგან მუხთარლის საკითხი ძალიან სენსიტიურია. რა თქმა უნდა. ჩვენ გვაქვს კომუნიკაცია და კოორდინაცია აზერბაიჯანელ კოლეგებთან. გამოძიება მიმდინარეობს და მე გავაკეთებ შეფასებას. როდესაც საგამოძიებო მოქმედებები დასრულდება", - განაცხადა მამუკა ბახტაძემ შეკითხვაზე საპასუხოდ.

იხილეთ ვიდეო