მოძრაობის წევრებს მხოლოდ პატრიოტული მოტივი ამოძრავებთ, - ამის შესახებ ყოფილმა დეპუტატმა ირაკლი ბათიაშვილმა განაცხადა, რომელიც ფილარმონიაში მოძრაობა "დაიცავი საქართველოს" შეხვედრას ესწრებოდა.
"ამ მოძრაობის წევრებს ამოძრავებთ მხოლოდ და მხოლოდ პატრიოტული მოტივი, პატრიოტული სულისკვეთება, გულისტკივილი ქვეყნის გამო. მე თავად დაკავებული ვარ სამეცნიერო- პედაგოგიური საქმიანობით და ვესწრები ამ მოძრაობის შეხვედრას, როგორც საზოგადოებრიობის ერთ-ერთი წარმომადგენელი, რომელიც ასევე დაინტერესებული ვარ საქართველოს უკეთესი მომავლით", - განაცხადა ბათიაშვილმა.
ჟურნალისტების კითხვაზე, იმედგაცრუებული არის თუ არა ის "ქართული ოცნებით", ბათიაშვილმა უპასუხა, რომ მან იცის, რომ საქართველო გადარჩება.
"მე ვიცი, რომ საქართველო გადარჩება და მას უკეთესი მომავალი ექნება. ამაში ღრმად ვარ დარწმუნებული", - აღნიშნა ირაკლი ბათიაშვილმა.
ფილარმონიაში "დაიცავი საქართველოს" შეხვედრა დასრულდა.