დავით ბაქრაძე - ადამიანებს ყოველთვიურად იძულებით ართმევენ ფულს, უმცირებენ ხელფასს და ეს ფული მიდის კომერციულ ბანკებში

ადამიანებს ყოველთვიურად იძულებით ართმევენ ფულს, უმცირებენ ხელფასს და ეს ფული მიდის კომერციულ ბანკებში, - ამის შესახებ "ევროპული საქართველოს" ლიდერმა დავით ბაქრაძემ ჟურნალისტებს დაგროვებით პენსიასთან დაკავშირებული საკითხის შეფასებისას განუცხადა.

მისი თქმით, საპენსიო რეფორმის შედეგად, მივიღეთ ახალი ბიუროკრატია, რომელიც ხალხის ხარჯზე არსებობს.

"რა მოგვიტანა დღეს საპენსიო რეფორმამ? პირველი - ადამიანებს ყოველთვიურად იძულებით ართმევენ ფულს, უმცირებენ ხელფასს და ეს ფული მიდის კომერციულ ბანკებში ანუ იმისთვის, რომ ჩვენი საკუთარი ფული კომერციულ ბანკში დაგვადებინონ ძალით, სახელმწიფო იძულებით გვახდევინებს კიდევ ფულს. არ არსებობს არანაირი გეგმა, არ არსებობს საინვესტიციო საბჭო, არსებობს უბრალოდ საპენსიო სააგენტო. ვინახავთ მორიგ ბიუროკრატიას, რომელიც ჩვენ ხარჯზე არსებობს, აქვს ძალიან მაღალი ხელფასები და დაკავებულია ახალი მავნებლური რეგულაციების მოგონებით, მაგალითად ისეთით, რომ თურმე ჩაერევა შრომით დავებში და დაააჯარიმებს კომპანიებს მათი თანამშრომლების ხელფასების ზრდის ან შემცირების მიხედვით," - განაცხადა დავით ბაქრაძემ.