თბილისის მერიამ მტკვრის ნარჩენებისგან დასუფთავება დაიწყო. თბილისის მერის დავალებით, „თბილსერვის ჯგუფის" და მერიის ინფრასტრუქტურის განვითარების საქალაქო სამსახურის ორგანიზებით მტკვრის დასუფთავების სამუშაოები მტკვარზე ამ წუთებშიც მიმდინარეობს.

დასუფთავების სამუშაოები მეტეხის ხიდის მიმდებარე ტერიტორიიდან დაიწყო და მდინარის საყოფაცხოვრებო ნარჩენებისგან - პოლიეთილენის პაკეტებისგან და პლასტმასის ბოთლებისგან გაწმენდას ითვალისწინებს.

"თბილსერვის ჯგუფის" დირექტორის პირველი მოადგილის დავით დოლიძის განცხადებით, აქცია მანამ გაგრძელდება, ვიდრე ტერიტორია სრულად არ დასუფთავდება.

„თბილისის მერის დავალებით, მეტეხის ხიდის ტერიტორიაზე განხორციელდება მდინარე მტკვრის დასუფთავების სამუშაოები, ვინაიდან, მიმდებარე ტერიტორიაზე მტკვარში ნარჩენებია. აქცია დაიწყო, გაგრძელდება იქამდე, სანამ არ იქნება ტერიტორია დასუფთავებული. გაწმენდითი სამუშაოები პირველად არ ტარდება. მსგავსი სამუშაო შარშანაც ჩატარდა და ორი წლის წინაც",- განაცხადა დოლიძემ.

რაც შეეხება ესტონეთის საელჩოს მიერ გავრცელებულ ინფორმაციას, სადაც მდინარე მტკვარზე გადაღებული ფოტოებია განთავსებული, დოლიძე ამბობს, რომ დასუფთავების სამუშაოები ამ ფოტოების გავრცელების შემდეგ არ დაუწყიათ და აქცია დაგეგმილი იყო.

"ჩვენ იმ პოსტთან კავშირი არ გვაქვს. ესტონეთის საელჩოს ჩვენთვის არ მოუმართავს. დავალება ქალაქის მერისგან მივიღეთ",- განაცხადა დოლიძემ.

"თბილსერვის ჯგუფი" სამუშაოებს საგანგებო სიტუაციების მართვის სააგენტოს დახმარებით ახორციელებს.