ყველა ადამიანმა, ვისაც უკაცრავად და შპალერის გაკვრა შეუძლია კედელზე, დაშვებულია, რომ იმუშავოს გაზის შიდა ქსელის მოწყობაზე, რაც დაუშვებელია, - ამის შესახებ ენერგოომბუდსმენმა სალომე ვარდიაშვილმა პარლამენტში, ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე ანგარიშის წარდგენისას განაცხადა.
როგორც ვარდიაშვილმა აღნიშნა, არავინ იცის ახალ კორპუსებში ვის მიერ არის გაზის შიდა ქსელი მოწყობილი, რადგან ქვეყანაში ქსელის მომწყობი კომპეტენტური ორგანიზაციები არ არსებობს.
„ჩვენ გვაქვს სერიოზული პრობლემები შიდა ქსელის მოწყობასთან მიმართებაში. არც ერთი ახალი კორპუსი არ არის ამისგან დაზღვეული იმიტომ, რომ შიდა ქსელი ვის მიერ არის მოწყობილი ჩვენ დღესაც არ ვიცით, არც თქვენ არ იცით და ასეთი ორგანიზაციები არ არსებობს, რომლებიც არიან კომპეტენტურები, რომ გაზის მეურნეობაში იყვნენ დაშვებულები. ყველა ადამიანმა, ვისაც უკაცრავად და შპალერის გაკვრა შეუძლია კედელზე, დაშვებულია, რომ იმუშავოს გაზის შიდა ქსელის მოწყობაზე, რაც დაუშვებელია. ჩვენ ამასთან დაკავშირებითაც გვქონდა პარლამენტში კონსულტაციები, როდესაც შეიქმნა უწყებათაშორისი კომისია. მე ჩემი რეკომენდაციები წარდგენილი მაქვს. ასევე ეკონომიკის სამინისტროში მიმდინარეობს აქტიური მუშაობა და პაკეტი უკვე არსებობს იმისთვის, რომ ეს პრობლემები გადავიდეს საკანონმდებლო ჭრილში და კანონად გადაიქცეს, რომ სამომავლოდ მაინც ავიცილოთ უსაფრთხოებასთან დაკავშირებული პრობლემები“, - განაცხადა სალომე ვარდიაშვილმა.