საქართველოს მუნიციპალური განვითარების ფონდმა მცხეთაში დევნილთათვის 2 კორპუსის მშენებლობა დაასრულა. როგორც „ინტერპრესნიუსს“ რეგიონული განვითარების და ინფრასტრუქტურის სამინისტროდან აცნობეს, პროექტი საქართველოს მთავრობამ 5.5 მილიონი ლარით დააფინანსა.

მათივე ინფორმაციით, საცხოვრებელი ბინები დღეს რეგიონული განვითარებისა და ინფრასტრუქტურის მინისტრმა მაია ცქიტიშვილმა, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ და მუნიციპალური განვითარების ფონდის აღმასრულებელმა დირექტორმა გიორგი შენგელიამ ადგილობრივი ხელისუფლების წარმომადგენელთან ერთად დაათვალიერეს.

რეგიონული განვითარების და ინფრასტრუქტურის სამინისტროს ინფორმაციით, სამუშაოები 2 საცხოვრებელი სახლის მშენებლობას, მიმდებარე ტერიტორიის კეთილმოწყობას და გარე განათების მონტაჟს ითვალისწინებდა. მათივე ინფორმაციით, ორივე კორპუსს აქვს საკუთარი ავტოსადგომი, პანდუსები, გზებზე დაიგო ასფალტ-ბეტონის საფარი და გაიმართა სანიაღვრე სისტემები. პროექტი სრულად არის ადაპტირებული შეზღუდული შესაძლებლობების მქონე პირებისთვის.

„მცხეთაში მცხოვრებ დევნილებს მძიმე პირობებში უწევდათ ცხოვრება და სასიხარულოა, რომ ძალიან მალე 120 ოჯახს საკუთრებაში გადაეცემათ ბინები. ამით ვახერხებთ ჩვენი მოქალაქეებისთვის ღირსეული საცხოვრებელი პირობების შექმნას და სახელმწიფოს საკუთრებაში არსებული შენობების გამოთავისუფლებას შემდგომი გამოყენებისთვის. ამ კონკრეტული პროექტის გარდა, ჩვენ 1500 ოჯახზე გათვლილი მიმდინარე მშენებლობები გვაქვს, თუმცა დევნილთა და ჯანდაცვის სამინისტროსთან ერთობლივ გეგმებში გაწერილია, რომ მომავალი 3 წლის განმავლობაში ქუთაისში, წყალტუბოსა და ზუგდიდში 3700 ოჯახი უნდა დავაკმაყოფილოთ“, - განაცხადა მაია ცქიტიშვილმა.