ამერიკის სასამართლომ გერმანული ქიმიური და ფარმაცევტული კონცერნი Bayer პასუხისმგებლად ცნო იმ ფაქტთან დაკავშირებით, რომ მისი შვილობილი კომპანიის Monsanto-ს მიერ წარმოებულმა ჰერბიციდმა მეუღლეებში ონკოლოგიური დაავადება გამოიწვია. ამის შესახებ „დოიჩე ველე“ იუწყება.
მსაჯულთა სასამართლომ კალიფორნიაში Bayer-ს ორი მილიარდი დოლარის ოდენობის (1.78 მილიარდი ევრო) კომპენსაციის გადახდა დაავალა წყვილისთვის, რომელიც კონცერნის კუთვნილ კომპანიას შხამიანი ჰერბიციდის წარმოებაში ადანაშაულებს.
ბრალდების მხარე შეეცადა დაერწმუნებინა ნაფიცი მსაჯულები, რომ Monsanto კვლევების მონაცემებით მანიპულირებას შეეცადა და სურდა პოტენციური საფრთხე დაეფარა. მედიასაშუალების ცნობით, ეს უკვე მესამე პროცესია, რომელიც Bayer-მა წააგო. თუმცა, კონცერნის ადვოკატები აპელაციის შეტანას გეგმავენ.
ამ დროისთვის ამერიკის სასამართლოებში Monsanto-ს წინააღმდეგ 13 400 სარჩელია შეტანილი.