იმ შემთხვევაში, თუკი აქტიურობა იქნება მაღალი, რა გაყალბებაც არ უნდა მოიფიქროს ხელისუფლებამ, რა საშუალებასაც არ უნდა მიმართოს, აუცილებლად გავიმარჯვებთ,- ამის შესახებ მთაწმინდის ოლქის მაჟორიტარობის დამოუკიდებელმა კანდიდატმა ლევან იოსელიანმა შტაბში გამართულ ბრიფნგზე განაცხადა.

იოსელიანის თქმით, მათი დამკვირვებლების მხრიდან მთაწმინდის საარჩევნო უბნებზე გარკვეული დარღვევები დაფიქსირდა, თუმცა ამ დროისთვის ყველა მათგანი აღმოფხვრილია. დარღვევების უმეტესობა მარკირებასთან იყო დაკავშირებული.

"31-ვე უბანზე გვყავს წარმომადგენელი და მათ მოგვაწოდეს ინფორმაცია, რომ მას შემდეგ, რაც გაიხსნა უბნები, იყო მცირე დარღვევები, მაგრამ ეს დარღვევები ამ წუთებში აღმოფხვრილია. რამდენადაც ჩემთვის ცნობილია, მშვიდ ვითარებაში მიმდინარეობს ხმის მიცემის პროცესი. მივმართავ ამომრჩეველს და ჩვენს მოქალაქეებს, პატარა დარღვევის შემთხვევაშიც მიმართონ უბნებზე ჩვენს წარმომადგენლებს, რომლებიც აუცილებლად მოახდენენ რეაგირებას და გააფორმებენ შესაბამის ოქმს",-განაცხადა ლევან იოსელიანმა.

მისივე თქმით, შტაბი ინტენსიურ რეჟიმში მუშაობს და მოქალაქეებს დარღვევების შესახებ ინფორმაცია შეუძლიათ ლევან იოსელიანის ფეისბუქის ოფიციალურ გვერდზე ან ტელეფონის ნომერზე- 2 990037 მიაწოდონ.

ამასთან, ლევან იოსელიანმა ამომრჩეველს მოუწოდა მივიდნენ არჩევნებზე და დააფიქსირონ საკუთარი ნება.

„მთავარი არის თქვენი, მოსახლეობის აქტიურობა და თქვენ აქტიურობაზეა დამოკიდებული შეძლებს თუ არა ხელისუფლება მისთვის სასურველი შედეგის დადებას",-განაცხადა იოსელიანმა.

იხილეთ ვიდეო