რუსეთის ქალაქ ეკატერინბურგში, ცენტრალურ პარკში ეკლესიის მშენებლობა გადაიფიქრეს. ერთკვირიანი არეულობის შემდეგ, ადგილობრივმა მთავრობამ გადაწყვიტა, რომ პარკში ტაძარი აღარ აეშენებინა. სარეკრეაციო სივრცეში კათედრალის მშენებლობის გეგმას ქალაქში მასობრივი საპროტესტო გამოსვლები მოჰყვა. აქციებს ათასობით ადამიანი ესწრებოდა, შეტაკებისას ათობით აქტივისტი დააკავეს.
გარდა ამისა, გამოკითხული მოსახლეობის 58% ეკლესიის პარკში აშენებას ეწინააღმდეგებოდა. მოსახლეობის ნაწილი ფიქრობდა, რომ კათედრალის მშენებლობის გამო, მწვანე საფარი დაზიანდებოდა.
რუსეთის მართლმადიდებელი ეკლესია კი ფიქრობს, რომ საბჭოთა კავშირის დროს განადგურებული ტაძრები ახლით უნდა ჩანაცვლდეს, ამიტომ საჭიროა ახალი ეკლესიების მშენებლობა.