მუშა, რომელიც ქუთაისში მშენებლობიდან გადმოვარდა, „თანამედროვე სამედიცინო ტექნოლოგიების დასავლეთის რეგიონალურ ცენტრშია“ მოთავსებული. მას მრავლობითი მოტეხილობა აქვს. მკურნალი ექიმის თქმით, დაშავებული მართვით სუნთქვაზე იმყოფება.

„სასწრაფო დახმარების ჯგუფმა 52 წლის მამაკაცი სიმაღლიდან ვარდნით მიღებული მრავლობითი ტრავმებით შემოიყვანა. მდგომარეობა კრიტიკულად მძიმეა. არის ტრავმული შოკი, მრავლობითი მოტეხილობები, იმყოფება მართვით სუნთქვაზე არასტაბილური ჰემოდინამიკით. ჩაუტარდა ყველა გამოკვლევა, ამჟამად მისი მდგომარეობის სტაბილიზებას ველოდებით, რომ დაიგეგმოს შემდეგი ტაქტიკა მკურნალობის მიზნით“, –განაცხადა ლევან ჭელიძემ.