„ჩაინა ლილო სითის" მფლობელის იურისტი - პოლიტიკურ განცხადებებს არ ვაკეთებთ, მაგრამ ცუდი გარემოებები დაემთხვა ერთმანეთს, მათ შორის ხანძრის ეს ფაქტიც

„ჩაინა ლილო სითის" მფლობელის იურისტის შალვა კაციაშვილის განცხადებით, სავაჭრო ობიექტში გაჩენილ ხანძართან დაკავშირებით ზუსტ პასუხს გამოძიება იტყვის.

როგორც შალვა კაციაშვილმა ჟურნალისტებს განუცხადა, "ჩაინა ლილო სითის" მფლობელს ლაურა ღაჭავას აქვს სხვა ბიზნესებიც, მათ შორის მშენებლობის მიმართულებით. იურისტის ინფორმაციით, ღაჭავას სხვა ბიზნესში რამდენიმე ნეგატიური შემთხვევა დაფიქსირდა. იურისტის თქმით, გუშინ გაჩენილ ხანძარსა და სხვა ბიზნესებში არსებულ პრობლემებს ერთმანეთთან არ აკავშირებენ, თუმცა "ცუდია,რომ ეს ფაქტები ერთმანეთს ემთხვევა".

„ჩვენ არ გვინდა, რომ ეს ფაქტი დავუკავშიროთ სხვა მოვლენებს, რომელიც ხდება. დღეს, კონკრეტულად არავინ არაფერს გვთხოვს, რაც ზეწოლად შეიძლება ჩაითვალოს, მაგრამ მეორე მხრივ, ჩვენთვისაც ბევრი რამ არის გაუგებარი. პოლიტიკურ განცხადებებს არ ვაკეთებთ, მაგრამ ვამბობთ მხოლოდ იმას,რომ ცუდი გარემოებები დაემთხვა ერთმანეთს მიყოლებით. მათ შორის ხანძრის ეს ფაქტიც. ამ ყველაფერს ერთმანეთთან არ ვაკავშირებთ, შესაძლოა, დამთხვევა იყოს",- განაცხადა იურისტმა.