თბილისის მინი ფეხბურთის სასკოლო ლიგა გაიხსნა

თბილისის საკრებულოში საკრებულოს სპორტისა და ახალგაზრდულ საქმეთა კომისიის ინიციატივით, თბილისის მერიისა და საქართველოს ფეხბურთის ფედერაციის მხარდაჭერით და ა(ა)იპ სპორტის მართვის მეთოდოლოგიის და ტექნოლოგიების ასოციაციის ორგანიზებით, ,,თბილისის მინი ფეხბურთის სასკოლო ლიგა’’ გაიხსნა. ტურნირი წელს პირველად ტარდება და 10 ივლისამდე გაგრძელდება. სასკოლო ლიგის მეგობარი კომპანიაა „პსპ“. ამის შესახებ „ინტერპრესნიუსს“ საკრებულოდან აცნობეს.

მათი ინფორმაციით, ტურნირი ოფიციალურად გახსნეს დედაქალაქის საკრებულოს თავმჯდომარემ გიორგი ტყემალაძემ და ფეხბურთის ფედერაციის პრეზიდენტმა ლევან კობიაშვილმა. სასკოლო ლიგის მონაწილეებს თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა და საკრებულოს სპორტის და ახალგაზრდულ საქმეთა კომისიის თავმჯდომარე გიორგი ჩაკვეტაძე მიესალმნენ.

თბილისის საკრებულოს თავმჯდომარემ ლიგის გუნდებს წარმატებები უსურვა და სპორტული აქტივობის მნიშვნელობაზე ისაუბრა.

„ძალიან მნიშვნელოვან ინიციატივას ჩაეყარა საფუძველი. ქალაქ თბილისის მერია, საკრებულო, ფეხბურთის ფედერაციასთან ერთად მრავალმხრივ მუშაობს იმაზე, რომ ჯანსაღი ცხოვრების წესი იყოს ჩვენი მოსწავლეების ერთ-ერთი მთავარი პრიორიტეტი. ჩვენ უნდა გავაკეთოთ ყველაფერი, რომ ამ პროცესს მაქსიმალურად შევუწყოთ ხელი. სწორედ ამას ემსახურება პროექტი „როცა სპორტი ცვლის სამყაროს“, რომელიც საკრებულოს სპორტის და ახალგაზრდულ საქმეთა კომისიის ინიციატივით დაიწყო. დღევანდელი ღონისძიება, რომელიც ამ პროექტის ფარგლებში გაიხსნა, მართლაც უპრეცენდენტოა. ასეთი მასობრივი პროექტი ხელს შეუწყობს ჯანსაღი ცხოვრების წესის და სპორტით დაინტერესების პოპულარიზაციას. მადლობა მინდა გადავუხადო ორგანიზატორებს ასეთი მასშტაბური ტურნირისთვის,“- განაცხადა გიორგი ტყემალაძემ.

თბილისის საკრებულოს სპორტის და ახალგაზრდულ საქმეთა კომისიის თავმჯდომარემ გიორგი ჩაკვეტაძემ ლიგის მონაწილეებს ტურნირის ჩატარების პრინციპზე მიაწოდა ინფორმაცია.

„ჩვენ ყველაფერს ვაკეთებთ, რომ ჩვენი ქალაქის და ქვეყნის ხვალინდელი დღე იყოს უკეთესი, ვიდრე დღევანდელი დღე. ტურნირი, რომელიც დღეს გაიხსნა, სწორედ ამ მიზანს ემსახურება. მინდა წარმატებები გისურვოთ და აღვნიშნო, რომ ამ პრინციპით და სისტემით მსგავსი ახალგაზრდული ჩემპიონატები ჩვენთან პირველად ტარდება. აქტიურად იქნება გამოყენებული ელექტრონული ტექნოლოგიები, თითოეული მატჩი ჩაიწერება და ყველას გექნებათ მაჩვენებლები, რომლის მიხედვითაც გამოვლინდება საუკეთესო გუნდი და მოთამაშე,“- განაცხადა გიორგი ჩაკვეტაძემ.

გახსნის ცერემონიაზე პროექტის და ვებ-გვერდის www.sfl.ge პრეზენტაცია გაიმართა.

სასკოლო ლიგაში თბილისის 32 საჯარო სკოლის 400-მდე მოსწავლე მონაწილეობს. მსგავსი ტიპის ღონისძიება ლიგისა და ფლეიოფის გაერთიანებული სისტემით და ელექტრონული ტექნოლოგიების აქტიური გამოყენებით პირველად ტარდება. ტურნირის მიმდინარეობის განმავლობაში თამაშები ყოველ შაბათ-კვირას გაიმართება.

საკრებულოს ინფორმაციით, პროექტის მიზანი მასობრივი სპორტის განვითარების ხელშეწყობა და სკოლებში ჯანსაღი ცხოვრების წესის პოპულარიზაციაა.

ვაჟა ბერიძე - გაუგებარია საზოგადოების რა ნაწილს წარმოადგენს მმართველი ძალა და ვისთვისაა „ოცნების“ ხელისუფლებაში დარჩენა სისხლხორცეულად აუცილებელი
ქართული პრესის მიმოხილვა 19.10.2019
თენგიზ ფხალაძე - ვინც ანაკლიის პორტის მიზანშეწონილობას ეჭვქვეშ აყენებს, იქნებ იმაზეც დაფიქრდეს, რატომ აჩქარებს რუსეთი ტამანში საკუთარი პორტის მშენებლობას?
აჭარული სოფლები და მთები, როგორც ოთხივე სეზონის ტურისტული პროდუქტი
„ლიბერთი ბანკის“ მხარდაჭერით, ახალი, ინოვაციური ონლაინ პლატფორმა - onoff.ge შეიქმნა
„ჯიპიაი ჰოლდინგი“ ყველა ავტომფლობელს სტიქიური რისკებისგან დაზღვევას უფინანსებს