გორისა და ქარელის მუნიციპალიტეტების სოფლების მოსახლეობას ძლიერმა წვიმამ, სეტყვამ და ქარმა ზიანი მიაყენა. წყალი შევარდა სახლების სარდაფებსა და პირველ სართულებზე.

„სეტყვის შედეგად მიყენებული ზარალის შესახებ ინფორმაცია ჯერ არ გვაქვს, თუმცა, სეტყვას თან ახლდა ძლიერი წვიმა და უხვმა ნალექმა გარკვეული პრობლემები შექმნა. გორში სწრაფად მოხდა შესაბამისი სამსახურების მობილიზება, ამ დროისთვის, შსს-ს საგანგებო სიტუაციების მართვის რეგიონული სამმართველოს და მუნიციპალიტეტის მერიის კეთილმოწყობის სამსახურის თანამშრომლები ერთობლივად მოქმედებენ და 112-ზე შესულ ყველა შეტყობინებაზე სწრაფად ხდება რეაგირება. ზარები ძირითადად უხვი ნალექის შედეგად სახლებში წყლის შესვლას უკავშირდება. ვითარება სტაბილურია და კონტროლს ექვემდებარება“, - განაცხადა "ინტერპრესნიუსთან“ საუბარში შიდა ქართლის გუბერნატორმა გიორგი ხოჯევანიშვილმა.

იხილეთ ვიდეო: გორისა და ქარელის მუნიციპალიტეტების სოფლები დაისეტყვა