IV მექანიზებული ბრიგადის 41-ე ბატალიონის სამხედრო მოსამსახურეები სიმონ ჯანაშიას სახელობის საქართველოს ეროვნულ მუზეუმს ესტუმრნენ.

როგორც „ინტერპრესნიუსს“ საქართველოს თავდაცვის სამინისტროდან აცნობეს, საქართველოს თავდაცვის მზადყოფნის პროგრამაში (GDRP-T), წინამოსამზადებელ წვრთნებში ჩართულმა სამხედრო მოსამსახურეებმა საბჭოთა ოკუპაციის ექსპოზიცია, მუზეუმში დაცული ოქროს ფონდი და ქართული იარაღ-საჭურველის გამოფენა დაათვალიერეს.

სამხედროების ეროვნულ მუზეუმში სტუმრობა მიზნად ცნობიერების ამაღლებასა და პატრიოტული სულისკვეთების გაღრმავებას ისახავს.

უწყების ცნობით, სამხედრო მოსამსახურეებისათვის მსგავსი საგანმანათლებლო-შემეცნებითი ღონისძიება თავდაცვის სამინისტროსა და ეროვნულ მუზეუმს შორის თანამშრომლობის ფარგლებში არაერთხელ განხორციელდა და მომავალშიც გაგრძელდება.